Buah Maram @ Asam Paya

Taja pan masam tang mayuh orang rindu makai buah maram. Sapa-sapa ajak ti asal ari Sarawak sigi suah meda buah tok di pasar. Di rumah panjai, buah maram sigi suah nyadi ulam di ruai laban di menua buah tok mayuh di sebelah tembawai.

Dicampur enggau pusuk enggau kicap ajak pan cukup meh. Tang sigi enda tau nadai dicampur enggau cabek mit. Paling cun ti di ulam ngena kuah belacan. Mayuh orang nyampur buah pisang muda tauka paling manah agik enti dicampur enggau paku. Bemacam-macam meh resipi ruai nitih ke peneka ati. Tang ingat enti udah mayuh ngulam anang enda ngirup aik amai mayuh-mayuh. Enti enda merepuai dalam.

Buah maram pan amat manah enti digulai dalam sup ikan. Masam ia nyamai sereta ngelenyau ka bau ikan.

Ari pun maram, ukai semina buah ia ajak tau dipakai tang upak  ia pan tau mega. Tang upak ia nang nyelai asai ari buah. Laban buah maram masam, upak ia pait. Sapa enggai makai upak ia, taja pan pait tang pait ia nyamai gak. Enti disumai upak maram dicampur buah maram mimit, sigi amat nyamai. Ia masam-masam pait. Enda ibuh beleman ti nyumai upak maram, sup campur pusuk ajak udah cukup manah.

Nya meh pemanah menua kitai Sarawak. Utai ti nyamai sereta nyelai bakatu sigi mayuh di serata endur. Tang beringat maya ngiga buah maram, laban pun maram tok mayuh duri ti tajam. Silap ari bulan ditusuk duri maram.

Simanggang

SIMANGGANG 

Nama asal Sri Aman suba Simanggang. Nama Simanggang tok diambik ari nama kayu Manggang. Kayu Manggang tok nyau kak baka kayu sawit. Ia mayuh tumbuh ti tisi aik pasar Simanggang. Pasar Simanggang dibuka kena taun 1849. Ia nyadi kubu ngau mega palan opis-opis perintah. Dalam taun 1849, Raja Sarawak ngaga siti kubu ti dikangau Kubu James di Sungai Skrang.  Taun 1853, kubu James diserang Rentap, dayak berani ari Skrang. Taja piak Retap enggau bala ke enggau ia enda bulih kubu James. Jun 1864, kubu James dipindah ke Simanggang. Arinya ia ditukar nama nyadi Kubu Alice. Kubu Alice nyadi ke tanda Simanggang terus mansang. Residen ke terubah di Simanggang ianya James Brooke.

(SUMBER ) http://sejarahmalaysia.pnm.my/portalBI/detail.php?section=sm03&spesifik_id=481&ttl_id=35

Buah Terung Iban

Kepuas aku ti maca utai dalam Internet, aku alu tetemu ke jerita tentang Buah Terung Iban. Bahasa asal ti dikena bak jerita tok Bahasa Malaysia, aku tukar ke bahasa iban, nyadi engka bisi gak reti utai ke ditukar aku nya nyau nyelai mimit. Aku arap ke bala ke maca nemu meh utai ke ditulis aku tok.

Terung Bulu, terung asam tauka terung Iban siti ari sayur buah ti selalu dikena kitai maya nyumai. Enti maya ke tamu, sigi bisi ajak kitai meda buah tok dijual. Ukai ajak buah tok berega ke maya ari tok tang ia mega tan enti disimpan lama.

Pokok Terung Bulu tok sama spesis enggau siti sayur di Amerika Selatan, ianya cocona (S. sessiliflorum), naranjilla (S. quitoense), enggau pseudolulo (S. pseudolulo).

Asal terung tok enda ditemu ari ni, tang buah tok ulih ditemu di merata menua. Paling suah buah tok bisi ditemu di India sampai ke menua Papua New Guinea temasuk meh menua-menua Asia Tenggara. Terung tok bisi ke ditanam enggau bisi sekeda nya tumbuh kediri.

Pun ia mit, peninggi antara 1-2 m, bisi bebulu, beduri mit. Daun ia nyau kak baka bentuk teluk manuk, panjai 5-40 cm dan lebar 3-40 cm. Tangkai daun 5-16 cm pemanjai. Sebedau bebuah, ia bisi bunga sampai 10 kuntum, kelopak bunga ia warna putih tauka ungu. Buah terung tok segala, ukuran diameter 1.5-3 cm, warna kunin ti maya udah tuai tang muda warna ijau.

Dalam buah terung asam tok bisi aik, karbohidrat, protein, lemak, serat, mineral dan vitamin.

Terung ditanam ngena igik ia, ia tumbuh dalam masa 2 minggu. Pun ia bebunga antara 3-4 bulan. Udahnya alu bebuah beberapa kali.

  

Buah terung tok selalu dikena nyumai ikan sup tauka dicampur dalam kari. Orang Iban selalu nyumai terung tok dicampur enggau bemacam salai. Masam terung tok dipecaya ka ulih muai bau bemacam jenis ikan. Di India terung tok nyadi asam kena sida nyumai kari. Di Thailand, bisi sos digaga ari terung tok dikelala enggau nama Nam Prek.

Ia ke temu aku, indai aku selalu nyumai terung tok dicampur enggau salai ikan. Enti ia ke muda nyamai di sumai sup campur enggau pusu. Tang sigi enda sama asai buah tok, enti tuai ke warna kuning nya masam enti di sumai, ia ke muda warna ijau nya kak pait-pait.

Pengelasan saintifik

Alam: Tumbuhan (tiada pangkat) Eudikot (tiada pangkat) Asterids Order: Solanales Keluarga: Solanaceae Genus: Solanum Spesies: S. ferox

Nama binomial

Solanum ferox (L.)

Sinonim

Solanum lasiocarpum

Penyayau ke Anak enda luya

Sapa enda sayau ke anak diri? Nadai siko apai tauka indai ti enda sayau ke anak sida empu. Munyi kok jako orang kelia, siko apai tauka indai ulih nyaga 10 iko anak tang 10 iko anak bedau tentu ulih nyaga siko apai tauka indai.

Nyau dunia kitai udah maju, bemacam utai nyau majak mayuh nyau majak manah. Ketegal sayau ke anak, mayuh apai indai sanggup begadai duit sida kena meli utai nya ke anak sida. Tang mayuh gak bala anak ti enda bulih utai bakanya ketegal apai indai ti enda begaji besai. Mayuh gak ke enda bulih utai ke bakanya laban apai indai enda ibuh kak meri utai bakanya laban bejimat ke duit kena sida ngirup enggau bala kaban sida.

Nya utai ke nyelai bansa kitai. Ukai semua tang mayuh apai indai enda peduli ke pemansang anak sida empu. Taja pan kitai nganjung sida ke sekula tang utai nya enda chukup. Enti bejako udah ngirup, semua enggai alah. Bejako ke telepon bincing ti majak canggih ke maya diatu, bejako ke laptop,i phone tauka tablet PC. Tang pengamai ia, amat ka kitai nemu pasal utai nya? Mayuh aku dinga bala apai indai enti maya anak sida minta kak meli pen, bub tauka perengka enggau sida belajar. Apai indai mayuh gik ke madah ke anak sida ngayah duit meli utai enda diguna tang duit nyau beratus kena meli aik arak enda gak sida ia ngira ia.

Ukai kak nyalah sapa-sapa. Enda salah kitai kak ngirup. Tang uji kitai lebih agik ke anak kitai. Mansang ke sida nitih ke pemansang dunia diatu. Beri sida sekula sampai ke paling tinggi. Awak ke ila lusa utai ti digaga kitai ke sida diturun ke anak sida jemah ila. Baru bansa kitai makin maju enggau mansang. Dikelala di serata dunia. Nyadi orang ti beguna enggau dikarap ka. Ukai orang tau pandai enti enda sida ia empu rajin ngereja pengawa ti meri pemandai ngau pemansang. Nadai anak bansa bukai nemu pandai ari ada enti apai indai ia ngajar sida ia enggau meri sida pemakai ti manah. Ukai ketegal kitai ti merinsa alu kitai enda meri sida ia utai ke manah tang enti kitai sigi nyaga pengawa kitai empu, nadai utai ke enda alah.

Semua utai be pun ari kitai empu magang. Enti kitai beamai enggau berambis ati ngereja ia. Kitai sigi bulih utai dikedeka.

Semaya Balang

Anang kelalu mudah pecaya ke danji. Betanam tebu bak mulut, tang ati keladi. Sigi sempama jako ti ngena amai lebuh kitai bejako ke danji. Nadai utai ke manah, meri pengaya ngau reta temu datai ngagai kitai bakanya ajak. Laban bala kitai tok kelalu manah alu nya meh ngasuh kitai mudah pecaya ke orang taja pan kitai enda ngelala orang nyak. Mayuh ketegal kitai ke pecaya ke sida laban sida tok ngena ngepan ke manah dipeda mata. Munyi ko orang anang madah ke siti-siti bup(buku) nya manah tau ke jaik ari kulit ia, baca dulu baru kitai nemu ia manah tau ka enda. Bakanya meh kitai mensia, anang ngumbai ia manah tau ka enda ari cara ia dipeda mata segenda. Ukai reti orang ke bebaju kot nya tau manah gik ari orang bebaju getah ti 'chok miok'.

Mayuh didinga rita bala indu bansa kitai nyadi 'keldai dadah' kok orang ianya sida maik dadah ke orang ti bejual ke dadah. Orang ke bejual dadah tok mayuh orang ari menua ribai, macam-macam meh duit ringgit, emas belian ngau macam -macam diberi sida ke bala indu dara ngena ngumpan sida alu madah ke diri ka jadi meh enggau sida. Mayuh bala kitai ti nyau udah mabuk laban danji ngau duit sereta utai ti berega nya alu enda berunding panjai agik Alu ngumbai bala ribai tok sigi bendar meh kak ke sida. Orang ke nipu orang tok sanggup nganti betaun-taun sebedau sida ia ngena indu ke udah ditipu sida maik dadah ke sida. Sida sanggup berabis duit ngambik ke bala indu kitai nya bendar-bendar pecaya ke sida.

Nya alai kitai deka beringat sebedau kena, enti orang ngasuh kitai raun ke menua ribai. Nyau udah bedanji deka bejalai sama tang nyau maya deka nepan bilun sida alu madah ke diri bisi masalah. Tauka sida dulu bejalai, sida ngasuh kita nitih dudi, udahnya sida ngasuh kita maik beg sida ia. Beringat meh kita, engka utai ke diasuh baik kita nya dadah. Anang ketegal kita udah ngelala ia kita alu enggai enda nulong sida ia. Sama meh ti sema orang ti enda dikelala minta baik utai bak padang bilun. Manah meh anang ajak. Biar meh kitai dipadah ke orang jaik. Laban ti utai nya ukai utai ke tau dibaik. Orang ti disalah ka sigi orang ke maik nya meh. Ti dadah nya, orang ke maik nya ulih kena ukum gantung sampai mati.

Beringat-ingat meh kitai sebedau nesal dudi engka nadai reti agik.

Raun-raun di menua Kuching

Nyau berapa ari enda aku maik bala anak enggau bini aku raun ke Kuching maya Gawai taun tok. Laban bini aku tok asal ari Sabah, nyak alai ia bedau kala ke menua Kuching. Semina ninga enggau meda ajak menua Kuching ari mulut orang mayuh. Aku pan lama udah enda ke Kuching taja pan menua nya udah puas bendar endur aku bemain kelia menya meya ti agik besekula.

Sigi nyau mayuh udah pemansang di menua Kuching. Nyau bendar amat aku tesat ari aku datai diak sampai ke pulai ari nya. Tang laban enda mayuh kereta bak menua Kuching(engka nyau pulai Gawai magang) nya meh nyamai endur aku bepusin-pusin dua tiga kali maya ngiga hotel endur kami sebilik diau pengelama 7 ari 6 malam.

Kebatang ia aku deka maik bala aku raun-raun ajak di shopping complex ajak tang laban menyadi indu aku ti alu bisi diak nyau mayuh agik endur bukai dituju kami lebih agik palan ngelantang ati ti mayuh bekait ngau babas. Rindu amat aku meda anak ngau bini aku ti gaga ati dibaik aku raun. Mayuh tempat dituju kami nya pan bedau kala gak dituju aku empu. Suba semina ninga ajak meh.

Taja pan lama gak kami raun di Kuching tang agik mayuh gak palan bukai enda sempat dituju kami laban aku ngenang ke anak aku ti agik mit nya. Tiap ari kami enda ulih pulai laun. Tang taja piak raun kami tok sigi nyadi ke buah kenang.

Taun Baru Cina

Ngenang bala kitai bansa Cina tik deka nyambut taun baru cina. Mayuh bala kitai tok deka mulai ke diri ke menua diri magang. Kedai pan nyau dihias bemacam corak tanglung. Semua bewarna merah magang. Lebih kurang 5 ari deka taun baru cina tang diatu udah mula ulih didinga bunyi mercun bedentum nyau kak ninting malam.

Ketegal cuti taun baru cina tok panjai. Nya alai ukai bansa Cina ajak ke pulai ke menua. Bala bansa bukai pan ngambi peluang mulai ke diri ke menua tau ka raun ke menua orang.

Bejimat ajak meh wai kaban, baik ke ari cara kitai niti jalai alun tauka ari cara kitai bebelanja bebeli ke utai tik mayuh murah laban taun baru cina tok.

Nuju bala tik enda mindah,aram meh kitai ngabang ngusung bala kaban kitai ke Cina ngicak ke bulih angpau meh.