Dunia I.T zaman mansang

Dunia reba baru ku urang maya dia. Nyau ka ninting urang maya dia tu bisi bekena ke Muabup,instagram,twitter ngau macam2 perengka pemerindang zaman mansang. Mayuh pemanah beguna ke utai tu. Sama ga mayuh utai ke enda manah. Aku selalu berunding sengaja ngemedis ke untak diri betanya nemu ke enda bala menyadi sendi aku tuju guna utai tu. Mayuh asai ku bala kitai beguna ke utai laban ke rindu. Laban urang bukai bisi enda patut kitai ka tinggal ari pemansang. Amatnya,ari urang tuai datai ke urang biak. Jangka ku nyau ka semua urang enda tau meleka ari utai tu.

Aku ka bekunsi mimit penemu aku empu tentang utai tu. Penemu di ulih aku ari ku meda bala madi bala kaban ke begulai ngau aku.

Bisi sekeda urang kelalu bagas. Mimit utai dipantai magang. Baru dani tinduk,ka makai,ka bejalai. Nyau ninting pengawa ti ulih dipadah magang diak. Di kunsi ngau bala kaban ku jaku. Nya mantai ke pengawa diri diak. Bisi sekeda mantai ke jerita pengidup bala ia ga. Anak pulai sekula,bini meli sayur,laki nurun nginti,madi nurun mandi. Macam jerita sida. Datai ke jerita ke enda patut bisi meh dibantai.

Bisi ga sekeda urang amat landik ku jaku betimbal penemu ngau urang bukai. Nama ja hal nyadi sida meri penemu. Enda kurang ke nyau bejaie ngemedis ati urang bejaku sengapa enda agi berunding dalam.

Makin sari makin nyadi pengawa urang ke beguna utai tu. Nyau mayuh gik majak berani bejaku mantai ke penemu ke dikumbai betul ku ati sida. Utai tu nyau majak enda ulih di sekat agi. Ti bisi undang-undang perintah nangkap urang ke bejako enda betul tauka ngidar berita enda betul. Jangka ku mayuh rakyat kita masuk jel. Jangka ku enda cukup rumah jel kitai.

Enda nemu ka nagang ka madah penemu kita sala enda tau dipantai. Nya pemandai kitai empu enti nasib enda manah utai ke mit sigi ulih nyadi tauka ngenatai pemerinsa ngagai kitai empu.

Mina siti pesan aku laban ku ngasai penemu aku tu patut dipadah ditusi ngagai kita. Engka bisi ke enda nemu tauka enda kala nyangka enda kala nyadang.

Ari muabup ajak kitai manding. Enti kitai bisi 100 kaban ke dikelala dibai kitai bekaban. Tiap pengawa pengidup kitai ka bekunsi ngau sida ngambi kaban kitai nya nemu. Kitai sigi rindu ati enti mayuh kaban kita nekan like ku jaku. Ari 100 kaban kitai nya. Tiap siko ari sida bisi gak kaban 100. Da nya alu betampung tiap urang bisi kaban kediri magang. Nyadi mayuh urang diak. Ukai semina kaban kitai 100 nya aja nemu ngau meda utai ke di post kitai ba muabup. Mayuh urang nemu. Enda ngajih rangkang ngacuk mata tang dalam dunia mayuh ragam mensia. Ti kena ke urang enda manah runding jaik perangai. Ari pengawa kitai ke semina ka minta like kaban kitai ke 100 nya kitai madah ke kitai kediri ajak di rumah. Engka bisi 1000 tauka 2000 tauka mayuh gik urang ulih meda status kitai nya. Urang bukai ti enda dikelala kitai. Kaban ngagai kaban kitai. Enda ke nya muka jalai ngagai urang ke enda sebaka manah runding baka kitai tauka kaban kitai. Ia alu ulih meda kisah kitai ke di pansut ba muabup taja pan kitai enda ngelala ia. Nyau besari sari kitai nusi pengidup kitai. Semua nya dipeda ngau ditemu urang nya.

Berunding kita bala menyadi. Manah ka pengawa nya. Enda ngira nya nuju kitai empu tauka bala kitai sebilik. Bala madi kitai bala anak kitai. Bini tauka laki kitai.

Buk sama chelum tang ati enda sebaka. Ti kitai madah ke urang pengurang sigi amat senang urang ngambi ulih.

Kolo Mee

Sapa enda ngelala pemakai tu enti ia sigi asal ari Sarawak. Urang ari menua bukai pan mayuh rindu ka makai Kolo Mee. Pemakai tu sigi mayuh ngau senang digiga di menua Sarawak tu. Nyau ka ninting kedai kupi bisi ajak bejual ke Kolo Mee. Rega ngau asai ia pan semua enda sebaka. Bisi ke enda datai bak asai ke di kerindu ke aku.

Baka aku sigi rindu be giga ke pemakai ti nyamai disepi nyawa. Sigi kin kiak nguji penyelaie pemakai.

Kolo mee aku lebi rindu makai ia ke mirah mansau laban asai ia bisi manis. Ia me burak pan nyamai gak laban ia sigi asai original. Munyi ko urang ia campur garam ngau bicing aja. Tang bisi gak sekeda kedai bisi nyual campur ngau kicap. Tu meh kadang ka nyadi penanggul. Ti sida ngena kicap ke enda ngam mi nya sigi masin. Nyau merinsa batang rekong ka nelan mi nya.

Kebendar ia mi kolo tu mi ti disepuh urang ba dalam aik ti angat. Enda tau ga kelalu lama ti nyepuh ia dalam aik angat nya. Da nya alu sepuh dalam aik celap. Udah nya baru nyampur ngau kereban sida kicap garam ngau bicing meh. Udah nya bisi gak campur cuka. Taja piak aku enda rindu ke Kolo Mee ti kelalu mayuh dicampur cuka taja pan Kolo Mee sigi dicampur cuka awak ke mi ia enda lucak.

Diatu kelalu mayuh urang bejual Kolo Mee ketegal bedagang. Ukai semina tegal sida ia pandai nyumai tauka rindu nyumai. Asai mi sida nyau enda tentu datai bak asai ke patut. Laban kelalu mayuh urang ti makai di kedai, mayuh gak ke enda kala nyepi asai mi sida. Nya alai bisi gak urang makai mi sida. Taja piak bisi gak urang rindu ke asai mi ti enda dikerindu ke aku. Baka bisi sekeda urang rindu ke pemakai ke nadai campur bicing. Ti aku engka enda entu ulih nyawa ku nerima utai asai nya. Ti bakanya aku sigi enda agi nuju tempat nya ila lusa. Munyi ke padah ku tadi kedai bejual mi mayuh.

Rega pan nyau mayuh uda enda sama. Mayuh agi nyual ia RM3. Tang bisi agi ga nyual RM2.50. Ti baka suba RM1.50 pan bisi. Asai pan nyamai. Mi mayuh. Daging campur pan mayuh gak. Diatu laban utai nyau embar magang mi sigi nyau mimit. Utai campur sigi nyau mimit. Tang ke enda patut asai mi mayuh nyau enda nyamai ba nyawa aku la.

Valentine's Day

Maya tok meh ari kitai nyambut pengerindu kitai enggau urang ti kitai sayau. Ukai reti ia ari bukai kitai enda sayau ke pangan diri gak. Ari tu semina ari dikena mensia ari serata dunya mantai ke penyayau ngau pengerindu ia ke pangan ti di sayau. Enti urang bujang dara mantai ke bala pangan ia. Enti da belaki bebini mantai ke laki bini diri serta anak meh.

Aku pan sama mega nyambut ari tok enggau bini serta anak. Baka aku sigi mai bala sida bejalai serta matah ke lengan bak tempat ke kira spesial. Taun tok KFC tuju kami semenyanak.

Kin kiak gak tempat makai penuh magang. Rega utai pan bisi niki gak maya tu. Bak tisi jalai nyau penuh alai baka ke bedagang bejual ke bunga serta anak patung.

Ba media sosial nyau mayuh gak bala sida ke membangkang pengawa nyambut ari Valentine tu. Enda nemu ngau enda setuju ke runding sida laban penemu aku utai ke manah sigi patut dikerja ngau di intu kitai ngau cara ke patut meh. Dunia udah majak mansang. Kitai nitih ke pemansang dunya nyadi sigi enda sala gak kitai nitih ke urang. Baka pengawa ngintu ari pengada kira ukai meh adat kitai tang diatu sama mega kitai ngintu ia.

Ba penemu aku siku, asal ajak utai nya manah, sigi patut kitai ngintu ia. Nitih ke runding kitai kediri magang nya. Ti sema kitai ngai ngintu ia anang gk kitai nganu urang bukai. Diau diri ajak meh asal jak urang bukai ke ngintu nya enda nganu kitai.

Munyi ku aku tadi, bakani pan adat tu mayuh urang ngai ngintu. Aku ngau bini serta anak sigi tetap ngintu ia belama. Engka rami gik ari taun ke udah jemah ila ukai tegal ia ari Valentine tang lebi agik tegal arinya ari aku. Ari pengada aku empu.