Selamat Hari Gawai

Pengawa ngindu ari Gawai sigi pengawa ti di anti bala kitai. Laban maya gawai meh kitai ulih begelumu ngau bala pangan serta kitai sebilik ketegal maya gawai mega mayuh bala pulai ke menua magang.Ngirup aik bisa tau ka aik sigi udah nyadi entara adat kitai meh dikena kitai merindang ati diri ngau bala pangan.

Tang anang enda ingat mega kitai wai.Ti lebuh udah sebening maya ngirup anang enda bejimat.Tauka kitai nya deriba,tauka kitai bebuti.Lagi ketegal ulah kitai ti nyau enda ulih tat ke agik kitai nyau belaya ngau pangan diri.Malu meh kitai wai.Dipeda orang bukai.Ti udah mabuk anang meh kitai deriba.Tajak pan kitai nadai maik orang nepan tang kitai ngira bala kaban ke bukai ti bisi enggau kitai deriba bak atas jalai alun mega.Enti kitai nya timpang tubuh laban udah siden agik meh kitai ulih nesal ke ulah kitai nya tang di alu bebadi.Urang bukai ti kasih ke kitai ti ditusah ke kitai.

Manah meh kitai ngintu ari Gawai tok ngau ati ti gaga ajak.Laban kitai ngintu Gawai sigi kak gaga.

Selamat ari Gawai ngagai semua kitai.

Jeffrey Nyaloi udah ninggal ke kitai

Sapa enda ngelala penyanyi ti ngembuan sada nyawa ti lunak tok? Enti kok aku ia sigi patut meh nerima pingat lebuh betanding bak Anugerah Juara Rentak Ruai ti udah. Kelebih ari leka lagu ia ti penuh enggau reti ti dalam,pemanah leka lagu enggau pengelunak ia main lagu sigi nadai endur mantah.

Berasai tekenyit ati aku lebuh ninga pesan bala Jeffrey Nyaloi bak radio madah ke penyanyi kitai tok nyau ninggal ke kitai ari menua injau tok. Enda nemu nama penyakit ti naban ke nyawa ia tang ia sigi tetap dikenang ngelama-lama ia.

Lagu Iban Diatu

Amat gaga ati aku diatu laban lagu bansa kitai iban nyau majak manah didinga serta tiun ti amat ngerindang maya kediri. Leka pan mayuh reti jako dalam ti bebungai-bungai. Ukai gak reti aku lagu lama suba enda manah tang lagu baru kitai ke diatu seiiring enggau pemansang dunya ke rebak diatu.

Kitai nyau bisi pingat diberi ngagai bala raban ti mantai ka pemanah serta pengelunak sada nyawa sida ia. Duit ringgit ti diberi ke sida ke tanda sida tok bisi gik orang ti ngerindu ari raban bukai. Ukai nya mimit-mimit duit ringgit ti diberi.

Nyau mayuh bala sida ke belagu landik serta bepenemu bak pengawa ti digaga sida serta ngadu ke pengawa enggau pemandai ngena komputer. Utai ti bakatu meh ti selalu niri ke bansa kitai sejalai ngau bansa bukai.

Pengawa bepilih

Ari penemu aku, pengawa orang ke bepilih ke tuai ti megai kitai sigi patut kitai sokong. Sokong ti kok aku ukai semina kitai baka raoh ngau manjong ngeroh ke aik tang sokong ti ke bendar ia kitai patut ngerejista diri nyadi pengundi lalu kitai nentu ke diri empu sapa ke sigi patut di undi kitai maya bepilih. Undi kitai nya enda patut gak besangkut enggau orang bukai. Ti orang kak milih siko nya kitai pan lalu deka milih sebaka enggau ia gak. Nya ukai cara bepilih ke bendar. Bakanya mega bisi sekeda orang ke ngundi siko-siko bala sida ke bediri ketegal orangnya anak mentri ti udah menang, mayuh duit serta dikerindu ke bala kitai ke bukai.

Nyadi nya pan tetap gak bedau betul. Orang ke sigi patut kitai pilih ti nitih ke penemu aku. Orang ti ulih meri pemansang ngagai kitai. Orang ke ukai semina bejako manis nabur janji. Ukai orang ke bediri nyau maya ari ngundi dampih. Ukai mega orang ke nadai kala ayan maya ia udah dipilih dulu agik arinya.

Kitai nyadi pengundi pan tusah meh kak nentu sapa ke sigi patut diundi. Bedau tentu gak kitai ngundi ia, ila lusa ia alu ingat ke kitai serta nulong kitai. Semua bala ke bediri belak bejako magang bejanji bemacam utai. Nyau nadai nemu meh kitai nentu ka sapa ke paling manah. Ujung-ujung tetap kitai empu meh mikir kediri. Kitai empu meh milih kediri. Nadai nemu enggau ia meh ti rian ke di juluk tang pulur ke labuh.

Selamat Berandau

Ke pengudah aku deka nulis blog dalam bahasa iban ketegal ati tok kelalu keran deka nguji ke pengelandik diri nulis serta ngemansang ka penemu diri dalam basa diri empu meh. Aku ngarap ke bala ti maca blog aku tok tau meh meri penemu enti bisi sekeda utai ti ditulis aku jemah ilak enda betul serta salah. Nadai salah ti kitai nguji blog dlm basa kitai empu.

Nyadi ngau gaga ati meh aku deka ngelalu ka bala temuai ngusung ruai aku tok.

Ohhhhh haaa...lalu meh wai...